'ഇങ്ക്വുലാബ് സിന്ദാബാദ് ' എന്ന പ്രശസ്ത രാഷ്ട്രീയ മുദ്രാവാക്യം ഉപയോഗത്തിൽ കൊണ്ടു വന്ന സ്വാതന്ത്ര്യ സമര നേതാവാണ്  'ഹസ്രത്ത് മൊഹാനി'. അദ്ദേഹത്തിന്റെ 'കുല്ലിയത്തെ ഹസ്രത്ത്' എന്ന പുസ്തകത്തിൽ നിന്ന് തർജ്ജമ ചെയ്യപ്പെട്ട വരികൾ:

*****

പിറന്നു വീണ മണ്ണിൻ വിമോചനസ്വപനം ഉണ്ടെല്ലാവർക്കും 

അധരങ്ങളതിനായി ഉള്ളുരുകുമ്പോഴും അധികാര മോഹം മായുന്നില്ലൊരിക്കലും

ആദർശത്തിൻ രക്തസാക്ഷിയാകണമെങ്കിൽ 

ശരീര ബന്ധനങ്ങളിൽ നിന്ന് സ്വയം മോചിതനാകൂ.

   *****

ചങ്ങലക്കെട്ടിലും ജയിൽപൂട്ടിലും ഞങ്ങളിലെയിച്ഛയായി വിമോചനം,

സത്യവുമ്മിഥ്യയും ഓർത്തുദ്ദരിക്കുന്ന നാവ് തന്നെയിത്.

സ്വേച്ഛാധിപതിക്കായി ഈ നെറ്റിത്തടം വീഴില്ലൊരിക്കലും, 

സുജൂദിൽ മാത്രമായി ഇന്നത് സന്തുഷ്ടത അറിയുന്നു. 

കിരീടമോഹവും സ്വർണദാഹവും ഞങ്ങൾക്കപരിചിതർ 

മാനവർക്കുടയനായവന് അടിമയായി ജീവിക്കുന്നവർ. 

രൗദ്രമാം രാത്രി നീങ്ങി പുലർകാലം ഉദിക്കും   

പ്രത്യാശയും ഹൃദയത്തിൻ സാക്ഷ്യവും അത് തന്നെ.